泰國立新法例 喺屋企吸煙可列作家暴罪！危害同住家人健康

泰國新法案Family Protection and Development Promotion Act，
如果喺自己屋企吸煙兼導致家人吸入二手煙，有可能會被視為犯罪？！

跟據泰國傳媒The Thaiger報導，
新法例由社會發展及人民安全部提出，旨在令家庭免受二手煙嘅危害，
而喺兒童面前吸煙，亦都會被視為一種家庭虐待。

根據調查，喺泰國有490萬個家庭入面係有一個或者多個家庭成員吸煙，
平均有1030萬人無意中成為二手煙受害者，研究亦都表明二手煙導致癌症嘅機會更大。

佢地幫75個二手煙家庭嘅兒童進行檢查，發現76%嘅兒童尿液中含有尼古丁痕跡，

而其中43％嘅兒童尼古丁含量超過允許嘅水平。

根據新法律，任何認為自己受到家庭二手煙影響嘅人都可以向有關官員舉報，
以便檢查員調查並對吸煙者採取法律行動。

新法例一出喺泰國引起極大迴響，唔少市民表明政府禁止喺屋企食煙嘅權利，侵犯公民自由！
而泰國衛生官員澄清，呢條法例並非阻止煙民喺屋企食煙，
此舉只係為左保護兒童同其他弱勢群體，免受吸煙者嘅二手煙對健康造成負面影響。
呢條法例8月20日起喺泰國生效。資料來源：thethaiger